Қазақстан Республикасы Президентінің «Алтын сапа» сыйлығын алуға арналған конкурс жиырма жылдан бері отандық бизнес үшін ең беделді марапаттардың бірі болып келеді. Көптеген кәсіпкерлер үшін оған қатысу республикалық деңгейде өздерін танытудың мүмкіндігі ғана емес, сонымен қатар компанияны одан әрі дамытуға, бизнес-процестерді жетілдіруге және өнімдер мен қызметтердің сапасын арттыруға серпін беретін маңызды құралға айналды.

Осыған байланысты Алматы қаласы Кәсіпкерлер палатасының алаңында өткен «Алтын сапа» және «Қазақстанның үздік тауары» конкурстарын өткізу тәртібі мен бағалау әдістемесіне арналған оқыту семинары бизнес қауымдастығы тарапынан үлкен қызығушылық тудырды.

Іс-шараға деген қызығушылықтың жоғары болғаны соншалық, зал көрермендерге лық толды. Қатысушылар қатарында бұған дейін конкурсқа қатысып, номинант немесе жеңімпаз атанған кәсіпкерлер де, алғаш рет өтінім беруді жоспарлап отырған компания өкілдері де болды.

Семинардың негізгі спикері Қазақстан Республикасы Ұлттық кәсіпкерлер палатасының республикалық конкурстарды ұйымдастыру жөніндегі басқарушы директоры Мерей Исаева болды. Кездесу барысында ол «Алтын сапа» және «Қазақстанның үздік тауары» конкурстарын өткізу тәртібін, қатысушыларды бағалау критерийлерін, конкурс материалдарына қойылатын талаптарды, өтінімдерді іріктеудің негізгі кезеңдерін және құжаттарды дайындау кезінде жиі жіберілетін қателіктерді жан-жақты түсіндірді.

Семинар барысында қатысуға қатысты практикалық мәселелерге ерекше назар аударылды. Кәсіпкерлерге конкурстың жаңартылған сайты арқылы тіркелу тәртібі, бағалауға ұсынылатын есептер мен материалдарды дайындау ерекшеліктері, сондай-ақ сарапшылар тобы өтінімдерді бағалау кезінде басшылыққа алатын негізгі критерийлер туралы толық ақпарат берілді.

Сонымен қатар қатысушыларға «Алтын сапа» байқауының 2026 жылғы жаңа арнайы номинациясы – «Цифрлық даму саласындағы үздік жоба» туралы айтылды. Бұл номинация жасанды интеллект пен цифрлық технологиялар саласындағы шешімдерді табысты енгізіп жүрген компанияларды марапаттауға мүмкіндік береді.

Семинар барысында кәсіпкерлер өздерін қызықтырған көптеген сұрақтарға жауап алып, конкурс материалдарын сапалы дайындауға қатысты практикалық ұсынымдармен танысты. Ұйымдастырушылар табысты қатысудың басты шарттарының бірі барлық талаптарды сақтау және құжаттарды белгіленген мерзімде тапсыру екенін атап өтті.

Алматы қаласы Кәсіпкерлер палатасы үшін сапа мәдениетін дамыту және өз қызметін жетілдіруге ұмтылатын компанияларды қолдау кәсіпкерлікті дамыту бағытындағы маңызды жұмыстардың бірі болып табылады. Әсіресе жыл сайын конкурстарға тек тәжірибелі қатысушылар ғана емес, сонымен қатар бәсекеге қабілеттілігін арттыруға, заманауи басқару тәсілдерін енгізуге және өндіріс пен қызмет көрсету сапасын жаңа деңгейге көтеруге ұмтылатын жаңа компаниялардың да қызығушылық танытып отырғаны қуантады.

Қазіргі уақытта Қазақстан Республикасы Президентінің «Алтын сапа» сыйлығын алуға арналған конкурсқа және «Қазақстанның үздік тауары» республикалық көрме-конкурсына өтінім қабылдау жалғасуда. Өтінімді altynsapa.kz ресми сайты арқылы беруге, сондай-ақ қажетті құжаттар пакетін кәсіпорын тіркелген өңірдегі кәсіпкерлер палатасына тапсыруға болады.

Алматы қаласы Кәсіпкерлер палатасында сапа конкурстарына қатысу республикалық деңгейдегі беделді марапатқа қол жеткізу мүмкіндігі ғана емес, сонымен қатар бизнесті дамытудың тиімді құралы екеніне сенімді. Мұндай жобаларға алматылық компаниялар неғұрлым көп қатысқан сайын, қаланың кәсіпкерлік қауымдастығы да, оның Қазақстан экономикасының дамуына қосатын үлесі де соғұрлым арта түседі.