Өндірісті қысқартпау ғана емес, өнім көлемін арттыру да кәсіпорынның басты мақсаты. Бұл мақсатқа олар лимонадтың жаңа түрлерін шығару арқылы қол жеткізбек.

2015 жылы Батыс Қазақстан облысы бойынша «Қазақстанның үздік тауары» өңірлік байқауында «Үздік азық-түлік тауарлары» номинациясы бойынша дипломант атанған – «Нұржанар» акционерлік қоғамы. Сондай-ақ, кәсіпорын Қазақстан Республикасы Президентінің «Алтын сапа» сыйлығына үміткерлер байқауына қатысуда.

«Нұржанар» АҚ – Батыс Қазақстан облысындағы ең көне кәсіпорындардың бірі, 1969 жылы құрылған. Мұнда консерванттар қолданылмай, экологиялық таза өнімдерден сыра, квас және лимонад өндіріледі. Өндірісте Ресей мен Германиядан әкелінген үздік сортты арпа уыты, ашытқы мен хмель қолданылады. Сонымен қатар, Урал өңірінің ерекше дәмі мен тазалығымен танымал суы пайдаланылады.

2004 жылдан бері зауытта кезең-кезеңмен жаңғырту жұмыстары жүргізілуде. Сыра өндірісінің барлық технологиялық тізбегіне заманауи құрал-жабдықтар орнатылған, бұл ұзақ сақталатын жоғары сапалы өнім шығаруға мүмкіндік береді. Қайнату цехының жабдығы – KRONES фирмасынан, ЦКТ (цилиндр-конусты танкілер) — Gresser, ал құю цехы KHS компаниясының қазіргі заманғы құрылғыларымен жабдықталған. Барлық жабдықтар – Германия өндірісі.

2011 жылы бөтелкедегі ауыз су өндіретін жаңа цех іске қосылды.

Кәсіпорын өзінің жарты ғасырлық тарихында түрлі кезеңдерден өтті: тұрақты өндіріс уақыты да, 90-жылдардағы белгісіздік пен құлдырау кезеңі де, 2008–2009 жылдардағы дағдарыс салдарынан тоқтап қалған қайта жандану әрекеттері де болды.

«Нұржанар» АҚ-ның бас директоры Рустам Ахметов қазіргі дағдарыс та кәсіпорынға әсерін тигізбей қоймағанын мойындайды. Алайда өткен жылдардан сабақ алып, сыра мен су өндірісінің барлық технологиялық желісін жаңғырту арқылы кәсіпорын өндірісті қысқартпауға тырысуда және, керісінше, өнім көлемін арттыруды көздеп отыр. Бұл мақсатқа олар лимонадтың жаңа түрлерін енгізу арқылы жетпек. «Қазіргі уақытта біз төрт түрлі сыра, екі түрлі квас, ауыз су және «Лайм» атты алкогольсіз сусын өндіреміз. Жақын арада өнім түрлерін кеңейтуді жоспарлап отырмыз», – деді Рустам Ахметов.

«Нұржанар» АҚ-ның өндірістік қуаты – жылына 5 млн декалитр немесе 50 млн литр. Өнімдер Батыс Қазақстанның барлық өңірлерінде және Ресей Федерациясының көршілес облыстарында — Самара, Орынбор, Саратов аймақтарында сатылады.

Бас директордың айтуынша, рубль бағамының құлдырауына байланысты сатылым көлемі сәл азайғанымен, өндірісті және жұмыс орындарын қысқартуға жол берілмеген. «Қазір теңгенің еркін айырбас бағамы енгізілген соң, Ресейге экспорт мәселесі біртіндеп тұрақталып келеді. Тіпті жаңа қызметкерлерді жұмысқа алдық», – деп бөлісті ол.

«2003 жылдан бері өндірісті жаңғырту бағытын ұстанған «Нұржанар» АҚ бүгінгі таңда да үнемі даму мен жаңару үстінде. Біз өнім сапасы мен бәсекеге қабілеттілігін үнемі бақылап отырамыз. Қазақстан Республикасы Президентінің «Алтын сапа» сыйлығына үміткер болу — біздің кәсіпорынның беделін арттырып, өнімдеріміздің танымал болуына үлкен серпін береді», – деп түйіндеді Рустам Ахметов.