Экологиялық таза қазақстандық тушенка өндірушілері экспортқа шығуды жоспарлап отыр

«Қазақстанның үздік тауары» өңірлік байқау-көрмесінде жеңіске жету — бұл тек өнім сапасының мойындалуы ғана емес, сонымен қатар алдағы жұмыс үшін үлкен ынталандыру. Осылай деп есептейді «Карат» ЖШС-нің басшылығы. Аталған серіктестік «Үздік азық-түлік тауарлары» номинациясында құрметті екінші орынды жеңіп алды. Алдағы жоспарларында — өнім түрлерін кеңейту және өндіріс көлемін ұлғайту бар.

«Бұл байқауға алғаш рет қатысып отырмыз және бірден жеңіске жеттік. Ұжым бұл жаңалықты үлкен қуанышпен қабылдады. “Үздік азық-түлік тауарлары” номинациясындағы жеңіс — ортақ еңбегіміздің нәтижесі. Бірақ бұл — үлкен жауапкершілік те. Біз алған мәртебеге сай болуымыз керек, яғни өнім сапасын үнемі арттырып отыруымыз қажет. Алдағы уақытта бірінші орынды да иеленеміз деген үміттеміз», — дейді өндірістік база директоры Рашид Отаров.

Ет консервілері цехы жарты жыл бұрын іске қосылғанына қарамастан, «Карат» ЖШС-нің өнімі Атырау облысы тұрғындары арасында үлкен сұранысқа ие болды. Биыл ұжым миллиондық консерві банкісінің шығарылуын салтанатты түрде атап өтті. Нысанның жалпы өндірістік қуаттылығы — жылына 12 миллион 600 мың банка. Бүгінгі таңда цех тәулігіне 35 мыңға дейін консерві шығарады.

Өндірісте екі ауысыммен шамамен 15 адам жұмыс істейді. Барлық қызметкерлер арнайы оқудан өткен. Цехта орнатылған заманауи неміс жабдықтары барлық технологиялық талаптарды сақтай отырып, сапалы өнім алуға мүмкіндік береді. Консерві өндірісіне экологиялық таза шикізат пайдаланылады. Мал шаруашылығы серіктестіктің өз базасында жүргізіледі.

«Қазіргі уақытта консерві банкілерін көршілес Ресейден жеткіземіз. Қалғанының бәрі — отандық өнім. Қазір қажетті жабдықтарды сатып алу және орнату жұмыстары жүргізілуде. Келесі айдан бастап консерві банкаларын өзіміз өндіруді жоспарлап отырмыз», — дейді өндірістік база директоры Рашид Отаров.

Бүгінгі таңда «Карат» тушенкасы Атырау облысынан бөлек, Батыс Қазақстан, Маңғыстау және Ақтөбе облыстарында сатылуда. Алдағы жоспар — өнімді экспортқа шығару. Сонымен қатар, серіктестік өнім желісін кеңейтуді көздеп отыр. Сиыр етінен жасалған тушенкадан басқа, қазыдан консервіленген ет, әртүрлі паштет түрлері өндіріліп, сүйек майын өңдейтін цех ашу, жем өндірісін жолға қою және өндірісті қалдықсыз жүйеге көшіру жоспарлануда.