Байқауды өткізу ережелерінің жаңа нұсқасы өңірлердің қатысуымен өткен кеңесте таныстырылды

Биыл «Атамекен» Ұлттық кәсіпкерлер палатасы ҚР Президентінің «Алтын сапа» сыйлығына байқау және «Қазақстанның үздік тауары» республикалық көрме-байқауын ұйымдастыру мен өткізуді жетілдіру бойынша бірқатар іс-шара өткізуді жоспарлап отыр.

Осыған байланысты Ұлттық палатада келесі мәселелерді талқылауға арналған кеңес өтті:

• байқауларды ұйымдастыру және өткізу үдерісін жаңарту;
• ҚР Президентінің «Алтын сапа» сыйлығына байқау моделін Еуропалық Сапа Менеджменті Қорының (EFQM) соңғы редакциясына сәйкес жаңарту;
• «Қазақстанның үздік тауары» республикалық көрме-байқауын өткізу рәсімдерін қайта қарау;
• байқау қатысушыларын ынталандыру шараларын қайта қарау;
• байқау қатысушыларының материалдарын алдын ала бағалау үшін сарапшыларды іріктеу критерийлері мен үдерісін, сарапшылардың еңбекақысын төлеу және басқа да мәселелерді қарастыру.

Жаңа ережелерді «Атамекен» ҰКП-ның Жұмыспен қамту мәселелері департаментінің директоры Салтанат Абдикаримова таныстырды. Талқылаудан кейін ол салалық қауымдастықтарды байқауларды өткізу бойынша өз ұсыныстары мен ұсынымдарын Палатаға жолдауға шақырды.